ماسکو۔17جون ( سیاست ڈاٹ کام ) سعودی عرب کے ولی عہد شہزادہ محمد بن سلمان نے روسی صدر ولادیمیرپوٹن سے گفتگو کرتے ہوئے کہا ہے کہ دونوں ممالک کے درمیان تعاون سے پوری دنیا کو فائدہ پہنچے گا۔سعودی ولی عہد جمعرات کو روس میں فٹ بال کے عالمی کپ ٹورنمنٹ کی افتتاحی تقریب میں شرکت اور میچ دیکھنے کے لیے آئے۔ شہزادہ محمد نے ولادیمیر پوٹن اور توانائی کے وزیر الیگزینڈر نوواک سے ملاقات کی۔ سعودی وزیر توانائی خالد الفالح اور وفد کے دوسرے ارکان بھی ان کے ہمراہ تھے۔قبل ازیں کریملن کے ترجمان دمتری پیسکوف نے ایک بیان میں کہاکہ دونوں ملکوں کے درمیان وفودکی سطح پرمذاکرات میں عالمی سطح پر تیل کی پیداوار میں کمی سے متعلق سمجھوتے پر تبادلہ خیال کیا جائے گا البتہ وہ اس سمجھوتے سے دست برداری کے بارے میں کوئی غور نہیں کریں گے۔
