حیدرآباد ۔ 22 جون (پریس نوٹ) اسٹیٹ حج کمیٹی کے زیراہتمام عازمین حج کے لئے ماہ رمضان المبارک کے دوران چار تربیتی اجتماعات کا بااوقات 9 بجے تا ظہر انعقاد عمل میں آئے گا جن کی تفصیل حسب ذیل ہے۔ اتوار 6 جولائی کو جامع مسجد قطب شاہی خیریت آباد، اتوار 13 جولائی کو جامع مسجد بی صاحبہ پنجہ گٹہ، اتوار 20 جولائی مسجد عامرہ ؍ عابد فنکشن ہال اور اتوار 27 جولائی جامع مسجد دارالشفاء مقرر ہیں۔ پروفیسر ایس اے شکور اسپیشل آفیسر اسٹیٹ حج کمیٹی ان اجتماعات کی صدارت کریں گے۔ عازمین حج کو ضروری امور سے واقف کروائیں گے۔ ممتاز علماء کرام فضائل و مناسک حج و عمرہ اور آداب زیارت روضہ نبوی ﷺ مدینہ منورہ کے علاوہ سفر حج سے متعلق ضروری امور سے واقف کروائیں گے۔ احرام باندھنے کا عملی مظاہرہ اور اس کی شرائط سے واقف کروایا جائے گا۔ ایگزیکیٹیو آفیسر اسٹیٹ حج کمیٹی جناب عبدالحمید نے تمام عازمین حج سے ان اجتماعات میں شرکت اور استفادہ کی اپیل کی ہے۔ خواتین کیلئے پردہ کا خصوصی انتظام رہے گا۔
