نئی دہلی 2 ڈسمبر ( سیاست ڈاٹ کام ) ملک میں جاریہ سال اکٹوبر تک فرقہ وارانہ تشدد کے جملہ 561 واقعات پیش آئے ہیں جن میں 90 افراد ہلاک ہوئے اور 1,688 افراد زخمی ہوئے ہیں۔ اتر پردیش میں فرقہ وارانہ تشدد کے سب سے زیادہ واقعات پیش آئے ہیں۔ لوک سبھا کو آج مطلع کیا گیا ۔ منسٹر آف اسٹیٹ داخلہ مسٹر کرین ریجیجو نے کہا کہ 2013 میں فرقہ وارانہ تشدد میں جملہ 133 افراد ہلاک اور 2,269 افراد زخمی ہوئے تھے اور جملہ 823 واقعات پیش آئے تھے ۔ انہوں نے کہا کہ سال 2012 میں اس نوعیت کے جملہ 668 واقعات میں 94 افراد ہلاک اور 2,117 زخمی ہوئے تھے ۔ انہوں نے کہا کہ جاریہ سال اکٹوبر تک اتر پردیش اس طرح کے واقعات میں سر فہرست ہے جہاں 25 افراد ہلاک ہوئے ہیں۔ راجستھان میں فرقہ وارانہ نوعیت کے واقعات میں 13 افراد ہلاک ہوئے ہیں۔ مسٹر رجیجو نے اپنے جواب میں ملک کی مختلف ریاستوں میں پیش آئے واقعات کی تفصیل سے ایوان کو واقف کروایا ۔
