سی ای ڈی ایم میں ایڈسیٹ مفت کوچنگ کا افتتاح ، ڈائرکٹر پروفیسر ایس اے شکور کا خطاب
حیدرآباد /11 مئی ( پریس نوٹ ) ایک ماہر اور شفیق معلم طلباء کی زندگی سنوارسکتا ہے اور اپنے شاگردوں کو عصر حاضر کے تقاضؤں سے ہم آہنگ ہونے اور مسابقت میں سب سے آگے رہنے کے قابل بناسکتا ہے ۔ طلباء میں احساس کمتری کو دور کرنا ، ان میں خود اعتمادی پیدا کرنا اور ان کی صلاحیتوں کو پروان چڑھانا ایک اچھے استاد کی پہچان ہے ۔ پروفیسر ایس اے شکور ، ڈائرکٹر سٹر ہذا نے کہا کہ محکمہ اقلیتی بہبود کے زیر سرپرستی مرکز تعلیمی ترقی برائے اقلیتی طبقات CEDM جامعہ عثمانیہ کی جانب سے معیار تعلیم کو بہتر بنانے اور حصول داخلہ اور حصول ملازمت کے مختلف مسابقتی امتحانات کیلئے انہیں تیار کرنے کے مختلف منصوبوں پر عمل آوری کی جارہی ہے جس کے خاطر خواہ نتائج برآمد ہو رہے ہیں اور پہلے کی بہ نسبت زیادہ تعداد میں اقلیتی امیدوار تعلیم اور ملازمت کے مسابقتی امتحانات میں شریک ہو رہے ہیں جن میں لڑکیوں کی قابل لحاظ تعداد شامل ہے اور یہ مثبت تبدیلی ایک درخشاں مستقبل کی آئینہ دار ہے ۔ سنٹر کی جانب سے دی جانے والی معیاری کوچنگ اور مطالعاتی مواد نے امیدواروں کا حوصلہ بڑھانے میں اہمکردار نبھایا ہے اور آج بھی اس سنٹر کی کوچنگ اور مطالعاتی مواد کی مانگ ہے ۔ ان خیالات کا اظہار پروفیسر ایس اے شکور ڈائرکٹر سی ای ڈی ایم عثمانیہ یونیورسٹی کالج ، ایڈسیٹ کی فری کوچنگ پروگرام کی افتتاحی تقریب سے خطاب کرتے ہوئے کیا اور کہا کہ حیدرآباد کے علاوہ نظام آباد ، محبوب نگر اور ظہیرآباد پر بھی Ed-Cet کوچنگ کا اہتمام کیا گیاہے ۔ نیز ICET اور ECET کوچنگ جاری ہے جہاں کوچنگ کے علاوہ مطالعاتی مواد بھی فراہم کیا جائے گا ۔ جناب شیخ چاند ساجد پراجکٹ آفیسر نے کہا کہ امیدوار نظم و ضبط اور پابندی وقت کے ساتھ کوچنگ سے استفادہ کرتے ہوئے بہتر رینک حاصل کرنے کی کوشش کریں تاکہ اچھے کالج میں داخلہ مل سکے ۔ شیخ کریم النساء پروجکٹ اسوسی ایٹ نے شکریہ ادا کیا ۔
