امریکی ڈرون حملوں میں رہنماؤں کی ہلاکت کے بعد قیادت کیلئے رسہ کشی
پشاور ، 7 مئی (سیاست ڈاٹ کام) پاکستان کے قبائلی علاقے شمالی وزیرستان کی تحصیل شوال میں منگل کو طالبان حریف گروہوں میں لڑائی کے نتیجے میں 13 عسکریت پسند ہلاک اور متعدد زخمی ہو گئے ہیں۔ ذرائع نے تصدیق کی ہے کہ شیر یار مسعود اور خان سید الیاس سجنا گروپ کے درمیان لڑائی کل صبح شروع ہوئی تھی جس میں دونوں جانب سے ایک دوسرے کے خلاف بھاری اور ہلکے ہتھیاروں کا استعمال کیا گیا تھا۔ اس سے قبل کی لڑائی کے بعد چند دن تک جنگ بندی رہی اور دعویٰ کیا گیا تھا کہ اس جنگ کو اعلیٰ طالبانی قیادت نے رکوایا تھا۔
ذرائع کے مطابق سرسبز شوال وادی میں دو گروپوں نے اپنے اپنے مورچوں پر بھاری ہتھیار نصب کر رکھے ہیں اور ہلاکتوں میں اضافہ کا امکان ہے۔ تحریک طالبان پاکستان کے سجنا اور شہریار گروہوں میں حکیم اللہ محسود اور ولی الرحمان محسود کی امریکی ڈرونز میں ہلاکت کے بعد اختلافات پیدا ہوئے اور دونوں ہی شمالی وزیرستان کے محسود قبائلی علاقوں میں ایک دوسرے پر اختیار اور کنٹرول کرنے کا الزام عائد کرتے رہتے ہیں۔ سجنا کو ولی الرحمان کا دایاں بازو مانا جاتا ہے جبکہ شہریار کو حکیم اللہ محسود کا بااعتماد ساتھی سمجھا جاتا ہے۔