پیانگ پانگ ۔ 23 مارچ (سیاست ڈاٹ کام) شمالی کوریا نے گذشتہ 24گھنٹوں کے دوران مختصر فاصلے تک مار کرنے والے راکٹوں کے درجنوں تجربے کئے ہیں جسے جنوبی کوریا نے عوام کے خلاف غصے کا اظہار قرار دیا ۔ تجزیہ کاروں کا کہنا ہے کہ راکٹوں کے یہ تجربے شمالی کوریا کا جنوبی کوریا اور امریکہ کی مشترکہ فوجی مشقوں کے خلاف احتجاج ہے ۔ آج سمندر میں تقریباً 16راکٹس داغے گئے جبکہ اس سے پہلے سنیچر کو 30راکٹ فائر کئے گئے تھے ۔ پیانگ پانگ کا دعویٰ ہے کہ راکٹ ٹسٹ معمول کی دفاعی مشق تھی لیکن خود شمالی کوریا نے سیول اور واشنگٹن کی مشترکہ جنگی مشقوں پر شدید تنقید کرتے ہوئے اس حملے کی تیاری قرار دیا ۔
عالمی سطح پر تنہا ہوجانے والا شمالی کوریا اکثر طاقت کا مظاہرہ کرتا ہے لیکن اس دفعہ اس نے غیر معمولی تعداد میں راکٹ فائر کئے ہیں ۔ ماہرین کا کہنا ہے کہ شمالی کوریا نے اس مہینے تقریباً 70 میزائل فائر کئے جس میں اس ہفتہ داغے جانے والے 46 راکٹ شامل ہیں ۔ جنوبی کوریا کی فوج کا کہنا ہے کہ لگتا ہے کہ جنوبی کوریا مینڈک یا فراگ راکٹ فائر کررہا ہے جو سوویت یونین کے زمانے کے بنے ہوئے ان گائڈڈ راکٹ ہیں جو 1960ء کی دہائی سے ان کے فوجی ساز و سامان کا حصہ ہیں ۔ جنوبی کوریا اور امریکہ دونوں نے شمالی کوریا کے راکٹ ٹسٹ کو تنقید کا نشانہ بنایا ہے ۔ امریکہ نے مارچ کے اوائل میں بھی اقوام متحدہ کی سیکیورٹی کونسل سے کہا تھا کہ وہ شمالی کوریا کے خلاف میزائل لانچ کرنے پرمناسب کارروائی کرے ۔ امریکہ کا موقف ہے کہ شمالی کوریا نے بیلیسٹک میزائل ٹکنالوجی استعمال کی ہے ۔ اقوام متحدہ کی قراردادوں کی رو سے شمالی کوریا کو بیلیسٹک میزائل ٹکنالوجی کو ترک کرنا ہوگا ۔