پیانگ یانگ ، 10 مارچ (سیاست ڈاٹ کام) شمالی کوریا کے سرکاری میڈیا کے مطابق ملک کے نوجوان رہنما کم جونگ اُن ملک کی اعلٰی ترین قانون ساز کمیٹی کے سربراہ منتخب ہو گئے ہیں۔ کم جونگ اُن کو اپنے آبائی علاقہ سے 100 فیصد ووٹ ملے، یعنی وہاں کے تمام اہل ووٹروں نے نا صرف اپنا حق رائے دہی استعمال کیا بلکہ تمام ووٹ بھی کم جونگ کی حمایت میں ہی ڈالے گئے۔ ملک کی سپریم پیپلز کونسل کیلئے ان انتخابات کو ’ربر اسٹیمپ‘ کہا جا رہا ہے کیونکہ تمام 687 حلقوں میں کم جونگ اُن کے مد مقابل کوئی دوسرا امیدوار نہیں تھا۔ گزشتہ پانچ سال میں یہ پہلے چناؤ رہے جن کے بعد پارلیمنٹ میں مزید اراکین شامل کئے جاسکتے ہیں۔ آئین کے مطابق ملک کی اسمبلی ہی سب سے طاقتور ترین ادارہ ہے، لیکن حقیقت میں سیاسی طور پر اس کے اختیارات بہت ہی محدود ہیں۔
