پیونگ یانگ ۔13مئی ( سیاست ڈاٹ کام ) شمالی کوریا نے جوہری تنصیبات کو 23 اور 25مئی کے درمیان تباہ کرنے کا اعلان کر دیا۔ صدر ٹرمپ نے فیصلے کا خیر مقدم کیا ہے۔میڈیا رپورٹس کے مطابق شمالی کوریا اپنی جوہری تنصیبات بند کرنے کے لیے تکنیکی اقدامات کر رہا ہے اور جوہری تنصیبات کے خاتمے کے دوران سرنگوں، ریسرچ عمارتوں اور چیک پوسٹوں کو دھماکوں سے تباہ کیا جائے گا۔ان تنصیبات کو 23 اور 25 مئی کو تباہ کیا جائے گا اور اس موقع پر امریکہ جنوبی کوریا اور دیگر ممالک کے صحافیوں کو مدعو کیا جائے گا۔دوسری جانب صدرامریکہ ٹرمپ نے کم جونگ ان سے ملاقات سے قبل شمالی کوریا کی جانب سے نیوکلیئرتنصیبات ختم کرنے کے فیصلے کا خیر مقدم کیا ہے۔ ٹرمپ اور کم جونگ ان کے درمیان ملاقات 12جون کو سنگاپور میں ہوگی۔
