واشنگٹن، 19 نومبر (سیاست ڈاٹ کام) امریکہ نے کہا ہے کہ شدت پسند تنظیمیں جس میں پاکستانی طالبان اور حقانی نیٹ ورک شامل ہیں نہ صرف پاکستان اور پورے خطے کیلئے بلکہ امریکہ کیلئے بھی خطرہ ہیں۔امریکی دفتر خارجہ کے ترجمان جیف راتھکی نے بتایا کہ یہ بات بہت اہم ہے کہ ان شدت پسندوں کو محفوظ پناہ گاہیں فراہم نہ کی جائیں۔ انھوں نے کہا کہ ہم یہی پیغام پاکستانی فوج کے سربراہ جنرل راحیل شریف کو بھی دیں گے۔ جیف راتھکی کے مطابق ہمیں پاکستان کے اعلیٰ حکام نے بتایا ہے کہ ان کی حکومت کی پالیسی ہے کہ وہ تمام شدت پسند تنظیموں کے خلاف کارروائی کریں گے۔ ترجمان بتایا کہ جہاں تک پاکستانی وزیر اعظم کے مشیر برائے قومی سلامتی و خارجہ امور سرتاج عزیز کا برطانوی نشریاتی ادارہ کو دیئے گئے بیان کی بات ہے تو ہم پاکستانی حکومت کی اس وضاحت کا خیر مقدم کرتے ہیں کہ وہ ہر طرح کی دہشت گردی کے خلاف ہے اور شمالی وزیرستان میں تمام دہشت گرد گروہوں کو نشانہ بنایا جا رہا ہے۔ دفتر خارجہ نے منگل کو سرتاج عزیز کے بیان کی وضاحت کرتے ہوئے کہا تھا کہ پاکستان نے ہر قسم کی دہشت گردی کے خاتمے کا عزم کر رکھا ہے اور آپریشن ضرب عضب میں دہشت گردوں کے خلاف بلا امتیاز کارروائی ہو رہی ہے۔
