خرطوم ۔ 10 ستمبر (سیاست ڈاٹ کام) سوڈان میں خوفناک اقتصادی بحران کے بعد صدرعمر البشیر نے قومی وفاق حکومت تحلیل کرتے ہوئے وزیر اعظم بکری حسن صالح اور وزیر خزانہ جنرل محمد عثمان الرکابی کو عہدوں سے ہٹا کر معتز موسیٰ کو نئی کابینہ تشکیل دینے کا حکم دیا ہے۔’العربیہ ڈاٹ نیٹ‘ کے مطابق سوڈان کی حکمران جماعت نیشنل کانگریس کے نائب صدر فیصل حسن نے بتایا کہ صدرعمرالبشیر نے نئی کابینہ تشکیل دینے کے لئے معتز موسیٰ کو وزیراعظم مقرر کیا ہے۔ وزیر دفاع اور وزیر داخلہ دونوں اپنے منصب پر قائم رہیں گے۔ پچھلی حکومت میں معتز موسیٰ بجلی اور پانی کے وزیر تھے۔
