نئی دہلی۔یکم فبروری( سیاست ڈاٹ کام) مرکزنے آج کہا ہے کہ وہ بعض ریاستوں میں سوائن فلو کے بڑھتے واقعات پر کڑی نظر رکھے ہوئے ہیں ‘ تاہم موجودہ صورتحال کو موسمی قرار دیا ۔ مرکزی وزیر صحت جے پی ندا نے کہا کہ وہ متاثرہ ریاستوں کے چیف منسٹرس اور وزرائے صحت سے ربط برقرار رکھے ہوئے ہیں ۔ انہوں نے سوائن فلو کے پھیلاؤ کو موسمی صورتحال کا نتیجہ قرار دیتے ہوئے اس سے نمٹنے کیلئے ممکنہ مدد کا تیقن دیا ۔ مرکزی وزیر صحت نے اپنی ٹیم تلنگانہ اور راجستھان کو روانہ کی تھی تاکہ سوائن فلو سے پیدا شدہ صورتحال کا جائزہ لیا جاسکے ۔ اس کے علاوہ مرکز ادویات کی فراہمی اور طبی معائنوںکو یقینی بنانے کے ساتھ ساتھ رہنمائی بھی کررہا ہے ۔
