سنگاپور۔ 10 اکتوبر (سیاست ڈاٹ کام)سنگاپور میں اب کوئی بھی اسکول جانے والا بچہ درجہ بندی حاصل نہیں کرسکے گا کیونکہ وہاں کی حکومت نے اسکولوں میں تعلیمی قابلیت جانچنے کا برسوں پرانا اول،دوم اورسوئم آنے کانظام ختم کرنے کااعلان کردیا ہے ۔سنگاپور کے وزیرتعلیم کا کہنا ہے کہ ،سیکھنے کے عمل کاکوئی مقابلہ نہیں،اسکول پرنسپلس سے اپنے خطاب میں انہوں نے کہا کہ آئندہ سال سے پرائمری اور سیکنڈری کلاسزمیں نتائج کا ایک دوسرے سے موازنہ نہیں کیا جائے گا بلکہ یہ دیکھا جائے کا بچے نے کتنا سیکھا ہے ۔انہوں نے کہا کہ نئے نظام کے تحت نا صرف جماعت میں اول اور دوم آنے والوں کاتذکرہ نہیں ہوگا بلکہ فیل ہونے والے نمبرزکوبھی ظاہر نہیں کیا جائے گا۔وزیرتعلیم کے مطابق نئی کوشش سے طالب علم ایک دوسرے سے سبقت لے جانے کے بجائے اپنی قابلیت میں اضافے کی کوشش کریں گے۔
