نئی دہلی، 25 اگست (سیاست ڈاٹ کام) وزیر خارجہ سشما سوراج پیر کو ویتنام اور کمبوڈیا کے چار دن کے دورے پر جائیں گی جس کے دوران وہ ویتنام میں بحر ہند کانفرنس کا افتتاح کریں گی ۔ وزارت خارجہ نے آج یہاں اس بارے میں معلومات دیتے ہوئے کہا کہ ویتنام اور کمبوڈیا کے دورے سے ان ممالک کی قیادت کے ساتھ عالمی ، علاقائی اور باہمی مسائل پر سنجیدہ تبادلہ خیال کرنے اور ان ممالک اور آسیان کے ساتھ اسٹریٹجک رابطے کو آگے بڑھانے کا موقع ملے گا۔ سشما سوراج 27 اور 28 اگست کو ویتنام میں رہیں گی اور جوائنٹ کمیشن کے 16ویں اجلاس کی ویت نام کے نائب وزیر اعظم اور وزیر خارجہ فیم بنہ کے ساتھ مشترکہ صدارت کریں گی۔ وہ وزیر اعظم نگوین شوان فک سے بھی ملاقات کریں گی۔ پیر کو وہ تیسری بحر ہند کانفرنس کا افتتاح کریں گی۔ وزارت خارجہ کے مطابق وزیر خارجہ 29اور 30 اگست کو کمبوڈیا میں رہیں گی۔ وہ کمبوڈیا کے امور خارجہ اور بین الاقوامی تعاون کے وزیر پراک سوکھون کے ساتھ دو طرفہ ملاقات کریں گی اور وزیر اعظم ہن سین اور سینیٹ کے صدر سے ملاقات کریں گی۔ سوراج کا یہ کمبوڈیا کا پہلا دورہ ہو گا۔
