ہندوستانی چوکیوں اور دیہات پر پاکستانی فوج کی گولہ باری ، چھوٹے ہتھیاروں کا استعمال
جموں، 4 مارچ (سیاست ڈاٹ کام) سرحد پر ایک دن کی خاموشی کے بعد پیر کی صبح جموں کے اکھنور علاقے میں لائن آف کنٹرول پر ہندوستان اور پاکستان کے درمیان شدید گولہ باری کا تبادلہ ہوا۔ دفاع کے ترجمان نے بتایا کہ جموں کے اکھنور سیکٹر میں پیر کی صبح پاکستانی فوج نے ہندوستان کی چوکیوں اور دیہات کو نشانہ بنایا۔انہوں نے بتایا کہ فائرنگ قریب 3 بجے شروع ہوئی اور صبح 6:30 بجے تک جاری رہی۔ انہوں نے بتایا کہ پاکستانی فوج نے گولہ باری اور چھوٹے ہتھیاروں کا استعمال کرکے ہندوستان کی چوکیوں اور دیہات کو نشانہ بنایا جس کا ہندوستانی فوج نے بھر پور جواب دیا۔ترجمان نے بتایا کہ کسی جانی یا مالی نقصان کی کوئی اطلاع نہیں ہے ۔ قابل ذکر ہے کہ راجوری کے نوشہرہ سیکٹر میں ہفتہ کی دوپہر کو طرفین کے درمیان دوگھنٹوں کی گولہ باری کے تبادلہ کوچھوڑ کر جمعہ کی شام سے لائن آف کنٹرول پر طرفین کی بندوقیں خاموش تھیں۔ گولہ باری تھمنے سے سرحدی لوگوں خاص کر راجوری اور پونچھ اضلاع کے لوگوں نے راحت کی سانس لی تھی جہاں طرفین کے درمیان گولہ باری کے تبادلے کی وجہ سے چار افراد جن میں ایک ہی کنبے کے تین افراد شامل تھے از جان جبکہ کئی دیگر زخمی ہوئے تھے ۔
