نئی دہلی 22 اپریل (سیاست ڈاٹ کام) حکومت نے سائبر سکیورٹی خطرات سے نمٹنے کیلئے قومی سطح کے میکانزم کو وضع کرنے کے اقدامات شروع کئے ہیں۔ اس سلسلہ میں 775 کروڑ روپئے خرچ کئے جائیں گے۔ آئندہ 5 سال کے دوران اس رقم کو سائبر سکیورٹی کے لئے استعمال کیا جائے گا۔ پارلیمنٹ میں تحریری جواب دیتے ہوئے وزیر مواصلات و آئی ٹی روی شنکر پرساد نے کہاکہ حکومت نے موجودہ حالات میں سائبر سکیورٹی کو خطرات لاحق ہونے میں اس سے نمٹنے کے لئے میکانزم وضع کیا جارہا ہے۔ پانچ سالہ پراجکٹ کے تحت سکیورٹی کو یقینی بنایا جائے گا۔ وزیر انفارمیشن ٹیکنالوجی نے مزید کہاکہ سائبر سکیورٹی پروگرام کے لئے بجٹ مختص کرتے ہوئے اس میں بتدریج 36.06 کروڑ روپئے کا اضافہ کیا گیا ہے۔ اور سال 2015-16 ء کے دوران 85 کروڑ روپئے بجٹ اضافہ ہوگا۔ پرساد نے کہاکہ سب سے اہم پروگرام سائبر فارنسک آلے تیار کرنا ہے۔ تحقیقات اور ٹریننگ کے لئے انفراسٹرکچر کو بھی فروغ دینا ہے۔
