آج مسودہ فہرست کی اجرائی ‘25 ستمبر تک اعتراضات قبول کئے جائینگے ‘8 اکٹوبر کو قطعی اشاعت
حیدرآباد 9 ستمبر (سیاست نیوز) تلنگانہ میں قبل از وقت انتخابات 2018 کی ووٹر لسٹ کی بنیاد پر ہون گے ۔ تلنگانہ چیف الکٹورل آفیسر مسٹر رجت کمار نے کہاکہ ریاست میں فی الوقت ووٹرلسٹ پر نظرثانی کا عمل منسوخ کر دینے مرکزی الیکشن کمشن نے ہدایات دی ہیں ۔ انہوں نے کہاکہ سال 2018 کی ووٹر لسٹ میں ضروری نظرثانی کی جائے گی ۔ کل 10 ستمبر کو مسودہ ووٹر لسٹ کا اعلان کیا جائیگا ۔اس مسودہ کے تعلق سے کوئی اعتراضات ہوں تو 10 تا 25 ستمبر قبول کئے جائیں گے ۔ مسودہ ووٹر لسٹ کے تعلق سے ریاست میں 15 اور 16 ستمبر کو گرام سبھائیں اور خصوصی کیمپس منعقد کئے جائیں گے ۔ انہوں نے بتایا کہ اعتراضات وصول ہونے کے بعد ترمیمات کر کے ووٹر لسٹ آئندہ ماہ 4 اکٹوبر کو شائع کی جائیگی ۔ 7 اکٹوبر کو ووٹر لسٹ کی طباعت عمل میںآنے کے بعد 8 اکٹوبر کوقطعی ووٹر لسٹ کا اعلان کیا جائیگا ۔انہوں نے بتایا کہ 2018 کی ووٹر لسٹ کے مطابق ریاست میںووٹروں کی تعداد 2,53,27,785 کروڑ ہے ۔ اس لسٹ میں ضروری ترمیمات کی جائے گی۔ مسٹر رجت کمار نے نے ضلع کلکٹروں سے کہاکہ آئندہ دو تین یوم میں نئے الکٹرانک ووٹنگ مشینس ‘ وی وی پیاٹس ‘بیل ”BELL” کمپنی سے آئیں گے ۔ ان کو محفوظ کرنے ضلع سطح پر گوداموں کو تیار رکھنے اقدامات کئے جائیں ۔ ان گوداموں کے ہاں سی سی کیمروں کی تنصیب کو یقینی بنایا جانا چاہئے ۔ ان ہدایات سے ضلع سپرنٹنڈنٹس پولیس کو بھی واقف کروایا جانا چاہئے ۔ انہوں نے کہاکہ قدیم ووٹنگ مشینوں کی تفصیلات جلد تیار کرکے رپورٹس روانہ کی جائیں ۔ مسٹر رجت کمار نے ضلع کلکٹروں سے خواہش کی کہ وہ نئے الیکٹرانک ووٹنگ مشینس آنے کے بعد ان کی کارکردگی کے تعلق سے عوام میں بیداری پیدا کی جائیگی۔ علاوہ ازیں انہوں نے بتایاکہ وی وی پیاٹس کی کارکردگی سے متعلق ریاست کے چھ ہزار الیکشن ریٹرنگ آفیسرس کیلئے جلد ٹریننگ پروگرامس منعقد کئے جائیں گے ۔ مسٹر رجت کمار نے بتایاکہ ریاست میں انتخابی تیاریوں کا آغاز کر دیا گیا ہے ۔ تیاریوں کا جائزہ لینے 11 ستمبر کو مرکزی الیکشن کمیشن کا وفد حیدرآباد کا دورہ کریگا ۔ 10 ستمبر کو وہ خود دہلی روانہ ہوںگے ۔ وہ چیف الیکشن کمشنر سے ملاقات کر کے تفصیلات سے واقف کروائیں گے ۔ مرکزی الیکشن کمیشن کے نمائندے انتظامات کا جائزہ لیکر دہلی روانہ ہونے کے بعد چیف الیکشن کمشنر کو اپنی رپورٹ پیش کریں گے اور اس رپورٹ کی بنیاد پرانتخابات منعقد کئے جانے سے متعلق اعلان کریں گے ۔