نیویارک۔ 10 اکتوبر (سیاست ڈاٹ کام) اقوام متحدہ کی سفیر برائے انسانی حقوق ینگہی لی نے اقوام متحدہ کو روہنگیا مسلمانوں کی نسل کشی اور جنگی جرائم کے مرتکب میانمار کی عسکری قیادت کو عالمی عدالت میں پیش کرنے کا مطالبہ کیا ہے ۔اے ایف پی کے مطابق انہوں نے کہا ہے کہ میانمارحکومت روہنگیا مسلمانوں کے خلاف ہونے والے ظالم کی تحقیقات کے لیے سنجیدہ نہیں ہے ۔اقوام متحدہ کے ‘فیکٹ فائنڈنگ مشن ‘نے مطالبہ کیا کہ میانمار حکومت کی اعلیٰ قیادت سے نسل کشی، جنگی جرائم اور انسانیت کے خلاف جرائم کی تحقیقات کی جائے ۔انہوں نے کہا کہ ریاست راکھین میں میانمار حکومت نے روہنگیا مسلمانوں پر بدترین ظلم کیا جس کے نتیجے میں 7 لاکھ 20 ہزار افراد کو پڑوسی ملک بنگلہ دیش ہجرت کرنا پڑی تھی۔واضح رہے کہ میانمار حکومت نے اقوام متحدہ کے ‘فیکٹ فائنڈنگ مشن’ کو جانبدار قرار دیتے ہوئے ان کے الزامات کو مسترد کیا ہے ۔گزشتہ برس دسمبر میں میانمار حکومت نے سفیر برائے انسانی حقوق ینگہی لی کو ملک میں داخلے سے روک دیا تھا۔
