واشنگٹن۔ 27 اپریل (سیاست ڈاٹ کام) امریکی حکام نے انکشاف کیاہے کہ روسی ہیکرز نے صدر اوباما کی حساس مگر غیر خفیہ ای میلز تک رسائی حاصل کرلی تھی، ہیکرز حملوں کے باعث وائٹ ہاؤس کے ای میل نظام کو بند کرنا پڑا۔ بھلے امریکہ دنیا بھر کی جاسوسی کرتاہو،خود سپرپاور کی طاقت ور ترین شخصیت بھی ہیکرز سے محفوظ نہیں۔ روسی ہیکرز ، جن کے حملوں اور وائٹ ہاؤس کے کمپیوٹرز تک رسائی کی وجہ سے امریکی حکام کو اکتوبر میں نیٹ ورک بند کرنا پڑا تھا ،ان کے سائبر اٹیکس کے بارے میں اصل بات اب ا مریکی میڈیا پر سامنے آئی ہے کہ ہیکرز صدر اوباما کی ای میلز پڑھنے میں کامیاب ہوگئے تھے۔ رپورٹس کے مطابق ہیکرز جن کمپیوٹر کو ہیک کرنے میں کامیاب ہوئے، وہ اگرچہ اندرونی خفیہ اور حساس ترین نیٹ ورک سے نہیں جڑے اور بیرونی دنیا سے پیغامات کے تبادلے کیلیے استعمال ہوتے ہیں تاہم ان پر اکثر حساس معلومات موجود ہوتی ہیں ، جیسے ای میلز ، سفیروں سے رابطے اور پالیسی معاملات پر بحث۔ ہیکرز نے امریکی صدر کی ای میلز ان اکاؤنٹ سے حاصل کیں جن کو یہ پیغامات صدر نے بھیجے تھے یا انہوں نے واپس صدر اوباما کو جوابی پیغام بھیجے ، بظاہر خود صدر اوباما کا اکاؤنٹ ہیکرز کے ہتھے نہیں چڑھا۔
