جے پور 6 اگست (سیاست ڈاٹ کام) راجستھان کے سرحدی علاقے شری گنگا نگر میں غباروں کے ساتھ پاکستان کے جھنڈے آنے کا سلسلہ آج دوسرے دن بھی جاری رہا۔پولیس کے مطابق شری گنگا نگر ضلع کے رائے سنگھ نگر کے ٹھنڈی گاؤں میں آج ایک کھیت میں رنگ برنگے غبارے کے ساتھ چاند ستاروں والا پاکستانی جھنڈا ملا۔ پولیس کے مطابق اس جھنڈے کے ساتھ انگریزی میں آئی لو پاک لکھا ہوا ہے ۔ یہ جھنڈا دو ٹکڑوں میں ملا ہے جو شایدہوا کے رخ میں کسی درخت سے الجھکر پھٹ گیا ہوگا۔ضلع کے پدمپورہ تھانہ کے بی بی 19 گاؤں میں بھی کل ایک کھیت میں اسی طرح کے غبارے کے ساتھ پاکستان کا جھنڈا ملا تھا جس پر جشن آزادی لکھا ہوا تھا۔ یہ پرچم تھانہ علاقہ کے ایک کھیت میں پڑا ہوا تھا جسے کھیت مالک راجندر سنگھ نے پولیس کے سپرد کیا۔راجستھان کے خفیہ محکمہ کے ایڈیشنل پولیس سپرنٹنڈنٹ دیکشا کابرانے کہا کہ اس طرح کے واقعات کی معلومات ہیڈکوارٹر کو بھیج دی گئی ہے ۔ خفیہ شاخ کے مطابق شری گنگا نگر سے پاکستانی سرحد ملتی ہے جہاں سے غباروں کے ساتھ پاکستانی جھنڈے لگا کر چھوڑے جاتے ہیں جو ہواؤں کے رخ کے سبب ہندوستانی سرحد میں داخل ہوتے ہیں۔
