نئی دہلی ۔ 7 ۔ جنوری (سیاست ڈا ٹ کام) دہشت گردی کے مسئلہ پر بی جے پی پر جوابی تنقید کرتے ہوئے کانگریس نے آج کہا کہ پاکستان کی اسپانسر کردہ دہشت گردی کے خلاف اس کے موقف میں کوئی تبدیلی نہیں آئی ہے لیکن پارٹی چاہتی ہے کہ مودی حکومت دہشت گرد کشتی واقعہ تناظر میں اپنی کارروائی موثر طریقہ سے انجام دے۔ بی جے پی نے دہشت گردی سے متعلق کانگریس کے موقف کو تنقید کا نشانہ بنایا تھا ، جس کے ایک دن بعد کانگریس کے ترجمان آنند شرما نے یہ واضح کردیا کہ ان کی پارٹی دہشت گردی کے خلاف جنگ میں ہمیشہ اول دستہ رہی ہے۔ انہوں نے صدر بی جے پی امیت شاہ کے اس ریمارک کو بھی غیر ذمہ دارانہ کہا کہ آیا کانگریس کا تعلق ہندوستان سے ہے یا پاکستان سے۔ آنند شرما نے کہا کہ پاکستانی علاقوں سے دہشت گردی کا انفراسٹرکچر فروغ پارہا ہے اور اسی سرزمین سے دہشت گردی کو منظم طریقہ سے پھیلایا جارہا ہے۔
