بروسیلز۔29 ڈسمبر۔(سیاست ڈاٹ کام) بیلجیئم کی ایک عدالت نے حکم دیا ہے کہ حکومت دو شدت پسند ماؤں اور ان کے 6 بچوں کو 40 دن کے اندر اندر واپس لانے کا انتظام کرے ۔ فیصلے پر دی گئی مدت کے دوران عملدرآمد نہ کرنے کی صورت میں حکومت کو فی بچہ 5000یورو روزانہ جرمانہ ادا کرنا ہو گا۔ اس سال کے آغاز میں مقامی ٹی وی (وی آر ٹی) کے ایک صحافی نے شام کے کردش علاقے میں واقع ایک رفیوجی کیمپ میں بیلجیئم سے تعلق رکھنے والی دو شدت پسند ماؤں کا انٹرویو کیا تھا جو وہاں اپنے 6 بچوں کے ساتھ مقیم تھیں۔یہ دونوں خواتین بیلجیئم سے 5سال قبل اپنے شوہروں کے ساتھ شام کے جہاد میں حصہ لینے کیلئے وہاں پہنچی تھیں۔ دونوں کے شوہر جنگ میں اپنی جان گنوا بیٹھے ہیں جس کے بعد وہ اپنے بچوں کو لے کر اس عارضی کیمپ میں منتقل ہوگئیں جہاں نہ پانی ہے اور نہ ہی کھانا دستیاب ہے ۔ دونوں نے اس خواہش کا اظہار کیا کہ وہ بیلجیئم واپس آنا چاہتی ہیں۔
