واشنگٹن ؍ بیجنگ۔ 7 جولائی ۔(سیاست ڈاٹ کام) چین اور امریکہ نے ایک دوسرے کی مصنوعات پر اربوں ڈالر کے نئے درآمدی ٹیکس عائد کر دیے ہیں، یوں دنیا کی 2 بڑی اقتصادی طاقتوں کے مابین تنازعہ شدید تر ہو گیا ہے ۔چین نے تاریخ کی سب سے بڑی تجارتی جنگ کے خلاف خبردار کیا ہے ، چینی برآمدات پر نئے امریکی درآمدی ٹیکس لگائے جانے کے بعد جواباً چین نے بھی امریکی درآمدات پر جمعہ 6 جولائی سے 34 ارب ڈالر مالیت کے اضافی محصولات عائد کر دیے ہیں، امریکہ میں ٹرمپ انتظامیہ نے چینی مصنوعات پر ان اضافی درآمدی محصولات کا اعلان کافی دن پہلے ہی کر دیا تھا اور یہ فیصلہ گزشتہ روز 6 جولائی سے نافذالعمل ہو گیا۔گزشتہ روز جیسے ہی اضافی امریکی محصولات عملی طور پر نافذ ہو گئے ، بیجنگ کی طرف سے بھی اسی وقت یہ کہہ دیا گیا کہ امریکی مصنوعات کی چین میں درآمد پر عائد کردہ اضافی محصولات بھی فوری طور پر مؤثر ہو گئے ہیں۔ بیجنگ نے کہا ہے کہ اس تجارتی جنگ کا آغاز امریکہ نے کیا تھا، جس کے ساتھ چین کو جوابی حملے پر مجبور کر دیا گیا، امریکہ دنیا کی سب سے بڑی معیشت ہے جس کے بعد دوسرے نمبر پر چین کا نام آتا ہے ۔
