لندن ؍دمشق ۔ 27 ستمبر ۔ ( سیاست ڈاٹ کام ) داعش مخالف امریکی اتحادیوں کی جانب سے دوسرے روز بھی جنگجوئوں کے زیرِقبضہ آئیل ریفائنریز کو نشانہ بنایا گیا،تازہ کارروائی میں اسلامک اسٹیٹ کے 4 ٹینک اور متعدد گاڑیوں کو تباہ کر دیا گیا۔ دوسری جانب برطانوی پارلیمنٹ نے عراق میں امریکہ اور اتحادیوں داعش مخالف فضائی کارروائیوں میں شمولیت کی منظوری دے دی ہے۔ برطانوی وزیر اعظم ڈیوڈ کیمرون نے ملکی پارلیمنٹ پر زور دیا ہے کہ عراق میں تباہی پھیلانے والے اسلامی اسٹیٹ کے شدت پسندوں کے خلاف فضائی حملوں کی منظوری دے دی جائے۔ امریکی محکمہ دفاع پنٹگان نے بتایا کہ یہ تازہ کارروائی شام اور عراق میں عسکریت پسندوںکے ٹھکانوں پر کی گئی ہے۔ادھر ڈنمارک کی حکومت نے کہا ہے کہ وہ اسلامک اسٹیٹ کے عسکریت پسندوں کے خلاف کارروائی کیلئے اپنے 7ایف سولہ جیٹ فائٹر طیارے روانہ کر رہی ہے لیکن یہ صرف عراق میں کارروائی کیلئے استعمال ہوں گے۔ دوسری جانب برطانوی پارلیمنٹ نے عراق میںامریکہ اور اتحادیوں کی داعش مخالف فضائی کارروائیوں میں شمولیت کی منظوری دی ہے۔ کیمرون نے پارلیمنٹ میں داعش کے خلاف فضائی کارروائیوںکیلئے منظوری کی درخواست کی تھی۔
