نیویارک ۔ 15 اگست (سیاست ڈاٹ کام) برطانیہ کی تیار کردہ قرارداد پر اقوام متحدہ کی سلامتی کونسل میں آج جمعہ کے روز باضابطہ ووٹنگ ہو گی۔ اس قرارداد میں عراق و شام کو اسلامی ریاست بنانے کا دعوی رکھنے والی داعش کے خلاف اقدامات کی سفارش کی گئی ہے۔برطانیہ کو امید ہے کہ اس کی پیش کردہ قرار داد متفقہ طور پر منظور کرلی جائے گی۔ ‘العربیہ’ کے بیورو چیف نیویارک کے مطابق قرارداد میں دہشت گرد تنظیم داعش اور اس کے پرتشدد نظریات کے خلاف سخت مذمت کی گئی ہے
۔قرارداد کے مطابق "داعش نے ایک منظم دہشت گردی کے ذریعے بین الاقوامی قوانین کی خلاف ورزی کرتے ہوئے انسانی حقوق کی بدترین پامالی شروع کر رکھی ہے۔ "قرار داد میں داعش اور النصرہ فرنٹ جیسی کسی بھی تنظیم کے ساتھ کسی بالواسطہ یا براہ راست تجارت کی بھی مذمت کی گئی۔مسودہ قرارداد میں اقوام متحدہ کے ماہرین سے مطالبہ کیا گیا ہے کہ عسکریت پسندوں کی طرف سے انسانی حقوق کی خلاف ورزیوں کی 90 دنوں کے دوران تحقیقات کی جائیں نیز داعش اور النصرہ فرنٹ ایسی تنظیموں سے خطے کو لاحق خطرات کا جائزہ لیا جائے۔