حیدرآباد ۔ 7 ۔ اپریل : ( پریس نوٹ ) : حج کمیٹی آف انڈیا ممبئی نے حج 2015 کے دوران مملکت سعودی عربیہ میں حجاج کرام کے قیام کے دوران ان کی مدد و رہنمائی کے مقصد سے خادم الحجاج کی تعیناتی کے لیے اہل مسلم سرکاری ملازمین سے درخواستیں طلب کی ہیں ۔ پروفیسر ایس اے شکور اسپیشل آفیسر تلنگانہ اسٹیٹ حج کمیٹی نے ایک پریس نوٹ میں بتایا ہے کہ سرکاری ملازمین کے علاوہ عوامی شعبہ کے اداروں ، دستوری اداروں کے ملازمین ، پولیس ملازمین و ہوم گارڈز ، محکمہ جنگلات اور محکمہ مال کے ملازمین 27 اپریل تک درخواستیں دے سکتے ہیں ۔ امیدواروں کی عمر یکم جولائی 2015 کو 25 تا 50 سال کے درمیان ہونی چاہئے اور انہوں نے حج ادا کرلیا ہو ، ان کے پاس 31 مارچ 2016 تک کارکرد انٹرنیشنل پاسپورٹ بھی موجود رہنا چاہئے ۔ ریاست تلنگانہ اور آندھرا پردیش کے لیے علحدہ علحدہ خادم الحجاج کا تقرر ہوگا ۔ پروفیسر ایس اے شکور نے مزید بتایا کہ ہر تین سو عازمین کے ساتھ ایک خادم الحجاج کو روانہ کیا جائے گا۔ امیدواروں کو عربی زبان کے علاوہ حج امور سے واقف ہونا لازمی ہے ۔ اگر کسی خادم الحجاج کی کارکردگی کے تعلق سے قونصل جنرل انڈیا ، حج کمیٹی آف انڈیا وزارت خارجہ کی جانب سے خراب رپورٹ وصول ہو تو ان کے سفر سعودی عربیہ پر ریاستی حج کمیٹی کی جانب سے جو رقم خرچ کی جارہی ہے وہ ان سے واپس وصول کی جائے گی ۔ درخواست فارم معہ تفصیلات دفتر حج کمیٹی واقع حج ہاوز نامپلی ، حیدرآباد ( فون نمبر 040-23298793 ) سے یا پھر تلنگانہ اسٹیٹ حج کمیٹی کی ویب سائٹ telanganastatehajcommittee.com سے بھی ڈاؤن لوڈ کئے جاسکتے ہیں ۔ درخواستیں تمام ضروری دستاویزات منسلک کرتے ہوئے دفتر حج کمیٹی میں داخل کی جائیں ۔۔
