حیدرآباد ۔ 11 مئی ۔ ( پریس نوٹ ) حج 2015 کے دوران خادم الحجاج کا منگل 12 مئی کو 4:00 بجے شام دفتر حج کمیٹی حج ہاوز نامپلی ،حیدرآباد میں قرعہ اندازی کے ذریعہ انتخاب عمل میں آئے گا ۔جناب سید عمر جلیل اسپیشل سکریٹری محکمہ اقلیتی بہبود حکومت تلنگانہ ، جناب شیخ محمد اقبال اسپیشل سکریٹری و کمشنر محکمہ اقلیتی بہبود حکومت آندھراپردیش اور جناب محمد جلال الدین اکبر بحیثیت مہمان خصوصی شرکت کریں گے ۔ پروفیسر ایس اے شکور اسپیشل آفیسر تلنگانہ اسٹیٹ حج کمیٹی صدارت کریں گے ۔اس سال خادم الحجاج کی حیثیت سے تعینات کیلئے جملہ 162 درخواستیں وصول ہوئیں جن میں سے بعد تنقیح 142 امیدواروں کو اہل قرار دیا گیا ۔ اس سال دونوں ریاستوں تلنگانہ و آندھراپردیش سے جملہ 14 خادم الحجاج کا قرعہ اندازی کے ذریعہ انتخاب عمل میں آئے گا ۔ تلنگانہ سے چار اور دونوں شہروں حیدرآباد و سکندرآباد سے تین ، ریاست آندھراپردیش کے علاقہ آندھرا سے تین اور علاقہ رائل سیما سے چار خادم الحجاج قرعہ اندازی میں منتخب ہوں گے ۔ حج کمیٹی اور وقف بورڈ سے تین خادم الحجاج کا انتخاب کیا جائے گا ۔اس طرح دونوں شہروں سے جملہ چھ خادم الحجاج منتخب کئے جائیں گے اور5209 عازمین حج کے ہمراہ جملہ 17 خادم الحجاج روانہ ہوں گے ۔
