حج کمیٹی کا تربیتی اجتماع، مولانا مفتی خلیل احمد، پروفیسر ایس اے شکور اور مولانا عبدالرشید طلحہ کا خطاب
حیدرآباد ۔ 24 مارچ (پریس نوٹ) مولانا مفتی خلیل احمد شیخ الجامعہ نظامیہ نے کہا کہ حج گناہوں کی معافی کا بڑا ذریعہ ہے۔ اگر کسی نے حج کیا اور اس کا حج مقبول ہوا تو وہ گناہوں سے ایسے پاک ہوجائے گا کہ گویا آج ہی ماں کے پیٹ سے پیدا ہوا۔ ایک چھوٹی سی رقم ہم اپنی ذات پر خرچ کرکے اتنی بڑی سعادت حاصل کرلیتے ہیں۔ تلنگانہ اسٹیٹ حج کمیٹی کے زیراہتمام ہائی ٹیک گارڈن ملک پیٹ میں عازمین حج کے پہلے تربیتی اجتماع سے بحیثیت مہمان خصوصی مخاطب کرتے ہوئے انہوں نے فضائل و مناسک حج و عمرہ بیان کئے اور عازمین کرام کو مشورہ دیا کہ وہ نماز اور دیگر فرائض کی پابندی کریں۔ حج ایک مقدس فرض ہے اور اس میں اللہ اور رسول اللہؐ کی رضا کو مقدم رکھنا چاہئے۔ حج کے قبول ہونے کی شرط یہ ہیکہ ہمارا مال پاک ہو، ہمارے اندر اخلاص ہو اور ہمارے اخلاق اچھے ہوں، زبان پر قابو رہے، زبان کی حفاظت کریں، صبر سے کام لینا ہوگا۔ مسلمانوں کو چاہئے کہ وہ رزق حلال کا اہتمام کریں۔ اللہ نے انسان و جن کو اپنی عبادت کیلئے پیدا کیا۔ اسپیشل آفیسر تلنگانہ اسٹیٹ حج کمیٹی پروفیسر ایس اے شکور نے صدارت کی۔ انہوں نے حج کے انتظامات پر تفصیلی روشنی ڈالی اور عازمین سے خواہش کی کہ وہ حج کمیٹی کے تربیتی اجتماعات میں شرکت کرتے رہیں کیونکہ ہر ہفتہ نئی ہدایات آتی رہتی ہیں۔ گرین زمرہ کا نام بدل کا NCNT زون رکھا گیا ہے جہاں نہ پکوان کی اجازت ہوگی اور نہ ہی ٹرانسپورٹ کی سہولت ہوگی۔ انہوں نے بتایا کہ ریال کے ریٹ پر آخری قسط کا تعین ہوتا ہے۔ حیدرآباد امبارکیشن پوائنٹ سے تین ریاستوں کے عازمین روانہ ہوتے ہیں اور توقع ہیکہ اس مرتبہ مہاراشٹرا کے عازمین کی بھی روانگی ہوگی۔ حافظ و قاری محمد نعیم احمد کی قرأت کلام پاک اور مولانا حافظ محمد انصار انور کی نعت شریف سے اجتماع کی کارروائی کا آغاز ہوا۔ جناب فاروق حسامی نے احرام کی شرائط بیان کیں اور احرام باندھنے کا عملی مظاہرہ کیا۔ خاتون عازمین کی کثیر تعداد بھی اس تربیتی اجتماع میں شریک تھی جن کیلئے متصلہ اے ون فنکشن ہال میں علحدہ انتظام کیا گیا تھا۔ اسسٹنٹ ایگزیکیٹیو آفیسر جناب عرفان شریف، فنکشن ہال کے مالک جناب ایم اے قدیر و ایم اے عزیز اور برادران نے انتظامات کی نگرانی کی۔ نماز ظہر کے بعد دوسرے اجلاس میں مولانا حافظ عبدالرشید طلحہ نعمانی نے فضائل و آداب و زیارت روضہ نبویؐ مدینہ منورہ پر روشنی ڈالتے ہوئے عازمین کو مشورہ دیا کہ وہ اس مقدس ترین سرزمین پر پورے ادب و احترام کا مظاہرہ کریں اور اپنے کسی قول یا فعل کے ذریعہ یہ ظاہر نہ کریں کہ ان سے دانستہ یا نادانستہ طور پر کسی قسم کی بے ادبی ہورہی ہو۔