جنڈو ، 23 اپریل (سیاست ڈاٹ کام) جنوبی کوریا میں کشتی ڈوبنے سے ہلاکتوں کی تعداد 150 تک پہنچ گئی جبکہ چہارشنبہ کو امداد اور تلاش کی کارروائیاں دوسرے ہفتے میں داخل ہوگئیں۔ گزشتہ چہارشنبہ کو 476 افراد کو ایک سیاحتی جزیرے پر لے جانے والا بحری جہاز جنوب مغربی ساحل کے قریب ڈوب گیا تھا۔ غوطہ خور اس پانچ منزلہ جہاز کی تیسری اور چوتھی منزل پر نہایت احتیاط سے راستہ بنا کر پہنچنے کی کوشش کر رہے ہیں۔ تیز سمندری لہروں کے باعث امدادی کارروائیاں سست روی کا شکار ہیں۔ محکمہ کوسٹ گارڈ کے ایک عہدیدار کو میونگ سوک نے کہا کہ غوطہ خوروں کی مدد کے جلد ہی زیر سمندر کارروائی کیلئے جدید سازو سامان مہیا کر دیا جائیگا۔
"ہم جلد ہی زیر سمندر کام کرنے والا ایک روبوٹ اور اسکینر مہیا کرنے کی منصوبہ بندی کر رہے ہیں جس کا مطلب ہے کہ ہم مختلف سازوسامان اور آلات فراہم کرنے میں جو کچھ بھی ممکن ہے وہ کر رہے ہیں۔” 150 سے زائد مسافر تاحال لاپتہ ہیں اور یہی خیال ظاہر کیا جارہا ہے کہ ان کی بھی موت واقع ہوچکی ہوگی۔ حکام کو خدشہ ہے کہ ہلاکتوں کی تعداد 300 تک پہنچ سکتی ہے جس سے یہ دو دہائیوں میں جنوبی کوریا میں ہونے والا سب سے زیادہ ہلاکت خیز سمندری حادثہ ہو گا۔ اس واقعے کے خلاف جنوبی کوریا میں سخت غم و غصہ پایا جاتا ہے خصوصاً حادثے کے وقت کشتی چھوڑنے والے اولین افراد میں شامل کپتان اور عملے کے ارکان پر لوگ شدید برہم ہیں۔