نئی دہلی ۔ 6 ۔ ستمبر : ( سیاست ڈاٹ کام ) : جموں و کشمیر میں سیلاب کی سنگین صورتحال پر گہری تشویش ظاہر کرتے ہوئے جس میں مہلوکین کی تعداد 170 ہوگئی ہے صدر کانگریس سونیا گاندھی نے آج مرکز پر زور دیا کہ وہ فوری طور پر ’ قومی آفات سماوی ‘ کا اعلان کردے ۔ انہوں نے مرکز اور ریاستی حکومت سے یہ بھی اپیل کی کہ متاثرین کو راحت پہونچانے اور ان کی باز آبادکاری کے لیے ہر ممکنہ کوشش کریں ۔ کانگریس کے سینئیر لیڈر غلام نبی آزاد اور ریاستی کانگریس یونٹ نے بھی مطالبہ کیا کہ ریاست میں رونما ہونے والی صورتحال کو قومی آفات قرار دیا جائے ۔ صدر کانگریس نے توقع ظاہر کی کہ حکومت ہند تمام ضروری اقدامات کرے گی ۔ سونیا گاندھی جموں و کشمیر کے کانگریس قائدین سے مسلسل ربط رکھی ہوئی ہیں ۔۔
