واشنگٹن ‘ 11 فبروری (سیاست ڈاٹ کام) امریکی وزیر خارجہ جان کیری رواں ہفتے میں چین، جنوبی کوریا، انڈونیشیا اور متحدہ عرب امارات کا دورہ کریں گے۔ کیری اپنے اس دورے کا آغاز جمعرات کو کریں گے اور یہ دورہ 18 فروری تک جاری رہے گا۔ واضح رہے کہ وزیر ِ خارجہ بننے کے بعد ایشیا کیلئے یہ جان کیری کا پانچواں دورہ ہوگا۔ امریکی محکمہ خارجہ کی ترجمان جین ساکی کے مطابق کیری اپنے اس دورے کے دوران سیول، بیجنگ، جکارتہ اور ابوظہبی جائیں گے اور وہاں پر اعلیٰ حکومتی عہدیداروں سے ملاقات کریں گے اور باہمی تعلقات کے ساتھ ساتھ علاقائی اور عالمی معاملات پر بھی گفتگو کریں گے۔ توقع ظاہر کی جا رہی ہے کہ بیجنگ اور سیول میں کیری چین کی جانب سے اُن دفاعی حدود سے متعلق بھی معاملات زیر ِ بحث لائیں گے جسے چین نے گزشتہ برس اپنا حصہ قرار دیا
جبکہ جنوبی کوریا اور جاپان بھی اسے اپنا حصہ قرار دیتے ہیں۔ کیری اس موقع پر شمالی کوریا کے جوہری پروگرام کے بارے میں گفتگو کریں گے۔ ترجمان محکمہ خارجہ کے مطابق کیری چینی حکام کو واضح کریں گے کہ امریکہ، چین کے ساتھ مثبت اور باہمی تعلقات پر مبنی رشتہ چاہتا ہے اور چین کی جانب سے عالمی معاملات پر پُرامن کاوشوں کو سراہتا ہے۔ توقع ظاہر کی جا رہی ہے کہ جان کیری شمالی کوریا سے متعلق معاملات پر بھی گفت و شنید کریں گے اور عالمی حدّت اور موسمیاتی تغیر کے حوالے سے امریکہ اور چین کی کاوشوں کی اہمیت کو بھی واضح کریں گے۔ سیول میں کیری شمالی کوریا کے ایٹمی پروگرام کے ساتھ ساتھ امریکہ اور جنوبی کوریا کے درمیان تعلقات کے فروغ کے ساتھ ساتھ خطے کے اور عالمی معاملات کو بھی زیر بحث لائیں گے۔