قبل از وقت بڑھاپے اور چہرے پر جھریاں کس کو پسند ہوتی ہیں مگر کیا آپ کو معلوم ہے کہ ایک بہت عام چیز آپ کو اس کا شکار بناسکتی ہے؟
جی ہاں یہ بات ایک نئی طبی تحقیق میں سامنے آئی ہے۔
تحقیق کے مطابق ذہنی تناؤکا شکار رہنا بڑھاپے کی جانب سفر کو انتہائی تیز کردیتا ہے۔
پچیس سال سے زائد عمر کی 2 ہزار خواتین پر ہونے والی تحقیق میں یہ بات سامنے آئی کہ ذہنی تناؤجلد پر مضر اثرات مرتب کرتا ہے جبکہ ہارمون کا نظام بھی عدم توازن کا شکار ہوجاتا ہے جس کے نتیجے میں قبل از وقت بڑھاپے کا خطرہ بڑھ جاتا ہے۔
تحقیق میں مزید انکشاف بھی کیا ہے کہ روزانہ گھر سے باہر نکل کر دفتر کا سفر بھی انسانی جلد پر نمایاں منفی اثرات مرتب کرتا ہے جس کی وجہ ماحولیاتی آلودگی ہے۔
ہوائی آلودگی کے نتیجے میں لوگ ایک سگریٹ کے مقابلے میں تین سو گنا زیادہ ایسے نقصان دہ اجزاء کو جسم کا حصہ بنالیتے ہیں جو جلد کا بڑھاپے کی جانب سفر تیز کرسکتے ہیں۔
تحقیق کے مطابق ان اثرات سے بچنے کے لیے وٹامن سی مددگار ثابت ہوسکتا ہے تاکہ آلودہ ہوا کے خلاف جسمانی دفاعی نظام جدوجہد کرسکے۔
تحقیق کے مطابق دن میں کچھ وقت کی فکرمندی یا تناؤہارمون کا توازن بگاڑنے کا باعث بنتا ہے جس کے باعث کیل مہاسوں سے لے کر جھریاں تک چہرے پر نمودار ہوسکتی ہیں۔
یہ تحقیق طبی جریدے آرکائیو آف انٹرنل میڈیسین میں شائع ہوئی۔
