حیدرآباد 30 جولائی (یو این آئی) تلنگانہ میں کئی علاقوں میں وقفہ وقفہ سے بارش کا سلسلہ جاری ہے ۔ بارش کے سبب حیدرآباد کے کئی نشیبی علاقے زیر آب آگئے جس سے عوام کو مشکل صورتحال کا سامنا کرنا پڑا ۔ کوٹھی ، عابڈس ، دلسکھ نگر ، ایل بی نگر ، امیر پیٹ ، ایس آر نگر ، جوبلی ہلز ، بنجارہ ہلز ، مہدی پٹنم ، راجندر نگر ، شمس آباد ، کوکٹ پلی ، حمایت نگر اور دوسرے علاقوں میں بارش سے سڑکوں پر پانی جمع ہوگیا اور ٹریفک میں رکاوٹ پیدا ہوگئی ۔ شہر میں4.9 سنٹی میٹر بارش ریکارڈ کی گئی۔گریٹر حیدرآباد میونسپل کارپوریشن(جی ایچ ایم سی) کے مطابق ملکاجگری میں 66.75 ملی میٹر ، مامڈی پلی میں 60.5 ، قطب اللہ پور 51.25 ، ترملگری 48.5 ، جیڈی میٹلہ 47.25 ، کاپرا میں37.5 ،شاہ پور 37.5 ، ویسٹ ماریڈ پلی میں 31 ، شیورام پلی میں 29، ملکاپور 24.5 اور بنڈلہ گوڑہ میں 22ملی میٹر بارش ریکارڈ کی گئی ۔ ناچارم کی انا پورنا کالونی میں بارش کا پانی سڑکوں پر جمع اور گھروں میں بھی پانی داخل ہوگیا ۔ اسی دوران ریاست میں بارش سے مختلف ذخائر آب کی آبی سطح میں بتدریج اضافہ ہوتا جارہا ہے ۔ ضلع عادل آباد کے کڈم پروجیکٹ میں4500 کیوزک پانی کا بہاؤ دیکھا گیا جس کے بعد 11ہزار کیوزک پانی اس سے چھوڑا گیا ۔ اس کی مکمل سطح 700 فیٹ ہے ۔ موجودہ سطح967 فیٹ ہے ۔ سری سیلم پروجیکٹ میں بھی پانی کا بہاؤ دیکھا گیا ۔ اس کی مکمل سطح آب885 فیٹ ہے ۔ جبکہ اس کی موجودہ سطح814.70 فیٹ درج کی گئی ہے ۔ اس میں 33259 کیوزک پانی آیا ۔ نظام آباد کے سری رام ساگر پروجیکٹ میں 30ہزار کیوزک پانی کا بہاؤ دیکھا گیا ۔
