دیار بیر (ترکی)۔14 اکٹوبر ۔ ( سیاست ڈاٹ کام) ترکی کے لڑاکا طیاروں نے ملک کے جنوب مشرقی علاقے میں سرگرم کردستان ورکرز پارٹی (پی کے کے) کے جنگجوؤں کو نشانہ بنایا ہے۔ سکیورٹی ذرائع کے مطابق مارچ 2013ء میں پی کے کے کی معلنہ جنگ بندی کے بعد ترک فضائیہ کا تنظیم کے ٹھکانوں پر یہ پہلا حملہ ہے۔ ترک لڑاکا طیاروں نے پیر کی شام عراقی سرحد سے ملنے والے کرد اکثریتی علاقے ھکاری کے جنوب مشرقی گاوں دغلیجہ پر بمباری کی۔ ادھر ’حریت نیوز‘ نامی ویب پورٹل نے آج ایک رپورٹ میں انکشاف کیا کہ ترک فضائیہ کے لڑاکا طیاروں نے ملک کے جنوب مشرقی علاقے میں اتوار کو کردستان ورکرز پارٹی کے ٹھکانوں پر حملہ کیا۔ دو سال قبل تنظیم کے ساتھ شروع ہونے والے امن عمل کے بعد آج کا حملہ پہلی فضائی کارروائی تھا۔نیوز پورٹل کے مطابق فضائی حملوں سے کردستان ورکرز پارٹی کو شدید نقصان پہنچا۔ترک فضائیہ کے ’پی کے کے‘ اہداف پر ڈرامائی حملے ایسے وقت ہوئے ہیں کہ جب انقرہ کی شامی علاقے عین العرب المعروف کوبانی کے حوالے سے پالیسی کے خلاف ترکی کے مختلف شہروں میں کردوں نے شدید مظاہروں کے بعد ترک حکومت اور کردوں کے درمیان امن عمل کھٹائی میں پڑتا نظر آ رہا ہے۔
