استنبول ۔ 23 اپریل (سیاست ڈاٹ کام) ترکی نے امریکہ کی جانب سے ایرانی تیل کی خریداری پردی گئی مہلت ختم کرنے کا امریکی فیصلہ مسترد کردیا۔العربیہ ڈاٹ نیٹ کے مطابق ترکی کے وزیرخارجہ مولود جاووش اوگلو نے ایک بیان میں کہا کہ امریکہ کی طرف سے ایرانی تیل پرپابندیوں کا نفاذ علاقائی اور امن وستحکام میں معاون ثابت نہیں ہوسکتا۔انہوں نے کہا کہ ترکی ایرانی تیل پر امریکی پابندیوں کے فیصلے کو قبول نہیں کرے گا۔ امریکی اقدامات یک طرفہ ہیں اور ترکی اپنے پڑوسی ملکوں کے ساتھ تعلقات خراب نہیں ہونے دے گا۔خیال رہے کہ امریکی صدر ڈونالڈ ٹرمپ نے گذشتہ روزایک بیان میں کہا کہ ایران سے تیل کی خریداری پردی گئی چھوٹ ختم کرنے کا اعلان کیا اور کہاکہ دومئی کے بعد ایران سے تیل کی خریداری پردی گئی چھوٹ ختم کردی جائے گی۔امریکہ کی طرف سے چین،بھارت، جنوبی کوریا، ترکی، جاپان، تائیوان،اٹلی اور یونان کو 2 مئی 2019ء تک ایران سے تیل کی خریداری جاری رکھنے کی مہلت دی گئی تھی۔ امریکہ نے اس مہلت میں مزید توسیع نہ کرنے کا اعلان کیا ہے۔
