واشنگٹن، 9 جون (سیاست ڈاٹ کام) ہر وہ شخص جس کے پاس انٹرنیٹ کی سہولت میسر ہے، سابق صدر بِل کلنٹن کے وائٹ ہاؤس دور کی دستاویزات کا مشاہدہ کر سکتا ہے، جن میں آج جاری کردہ تازہ ترین 2000 صفحات شامل ہیں۔ امریکہ کے ادارہ ’نیشنل آرکائیوز‘ کے جاری کردہ ریکارڈ میں ہے کہ سابق وزیر خارجہ ہلاری کلنٹن 2016ء کے صدارتی انتخابات میں دوسری مرتبہ امیدوار بننے کے بارے میں سوچ رہی ہیں۔ اِن دستاویزات کو ویب سائٹ پر دیکھا جا سکتا ہے۔ اِس سے قبل رواں سال کلنٹن دور کے ریکارڈ کے ہزاروں اوراق پہلے ہی جاری کئے جا چکے ہیں۔ اِن کاغذات میں کلنٹن کی تقاریر کے مسودوں سے لے کر ’وائس آف امریکہ‘ کی طرف سے ہلاری سے کئے گئے انٹرویو سے متعلق بھیجی گئی اِی میلز تک شامل ہیں۔ اِن اِی میلز میں یہ بات شامل تھی آیا اُن سے کلنٹن کی وائٹ ہاؤس اِنٹرن مونیکا لیونسکی کے بارے میں سوال پوچھے جا سکتے ہیں۔ ہلاری کے محکمہ خارجہ کے دور سے متعلق اُن کی نئی کتاب ’ہارڈ چوائس‘ کا منگل کو افتتاح مقرر ہے۔
