جنیوا ، 10 جنوری (سیاست ڈاٹ کام) سلامتی کونسل کی پانچ ویٹو طاقتوں اور جرمنی کے ایران کے ساتھ جنیوا میں مذاکرات گزشتہ روز سے جاری ہیں۔ ان کا مقصد نومبر میں ایران کے ساتھ ہونے والے عارضی جوہری معاہدے کو نافذ العمل بنانا ہے۔ اس مرحلے کا سب سے اہم نقطہ یورانیم کی افزودگی کیلئے استعمال ہونے والے سنٹری فیوجز پر تحقیق جاری رکھنے کا ہے۔ تہران حکومت کا اصرار ہے کہ وہ اس شعبے میں مزید تحقیق کا حق رکھتی ہے۔ جمعرات کو مذاکرات کے پہلے مرحلے کے بعد کوئی بھی بیان سامنے نہیں آیا تھا۔ تاہم تہران نے کہا کہ دوسرے مرحلے کے مذاکرات کے آغاز سے پہلے چند تکنیکی مسائل پر گفتگو جاری ہے۔ نومبر میں یہ بھی طے پایا تھا کہ عارضی معاہدے کو جنوری میں نافذ العمل بنا دیا جائے گا۔
