واشنگٹن۔ 8 اگسٹ ۔(سیاست ڈاٹ کام) امریکی صدر ڈونالڈ ٹرمپ نے ایران پر پابندیوں کے نفاذ کے بعد تہران کے ساتھ کاروباری روابط رکھنے والے ممالک کیلئے سخت تنبیہ جاری کی ہے۔ سماجی رابطوں کی ویب سائیٹ ’ٹوئٹر‘ پر اپنے پیغام میں انھوں نے ایسے ممالک کو مخاطب کرتے ہوئے کہا ہے کہ اگر وہ ایران کے ساتھ کاروبار کرتے ہیں تو امریکہ کے ساتھ تجارت نہیں کر سکیں گے۔واضح رہے کہ امریکی صدر کے حکم نامے پر دستخط کے بعد ایران پر منگل کی صبح سے پہلے مرحلے کی پابندیاں عائد کر دی گئی ہیں۔ان پابندیوں میں ایران کے مختلف شعبوں کو نشانہ بنایا گیا جبکہ ایران کے تیل کی درآمد پر پابندیاں نومبر سے لاگو ہوں گی۔ ٹرمپ نے اپنی ٹویٹ میں مزید کہا کہ ’’اس سے قبل اتنی سخت پابندیاں کبھی نہیں لگائی گئی تھیں اور نومبر میں یہ اور سخت کر دی جائیں گی۔ میں صرف عالمی امن کا مطالبہ کر رہا ہوں‘‘۔بظاہر صدر ٹرمپ کی ٹویٹ یورپی یونین کے ممالک کی جانب اشارہ ہے جنھوں نے امریکی اقدامات کی مخالفت اور اپنی کمپنیوں کی جائز تجارت کو تحفظ فراہم کرنے کا عہد کیا ہے۔
