تشکیل کمیٹی کے بعد پہلا اجلاس، باجے ریڈی گوردھن صدرنشین کمیٹی مقرر
حیدرآباد ۔ 23فبروری ( سیاست نیوز) اوقافی جائیدادوں سے متعلق تلنگانہ اسمبلی کی ایوان کی کمیٹی کا اجلاس 25فبروری کو منعقد ہوگا ۔ اسمبلی میں اوقافی جائیدادوں کے مسئلہ پر ایوان کی کمیٹی کی تشکیل کے بعد یہ پہلا اجلاس ہے ۔ اسپیکر مدھو سدن چاری نے ٹی آر ایس رکن اسمبلی باجے ریڈی گووردھن کو کمیٹی کا صدر نشین مقرر کیا ہے ۔ مختلف جماعتوں سے تعلق رکھنے والے ارکان اسمبلی و کونسل کمیٹی میں شامل ہیں جن میں کانگریس ‘ تلگودیشم ‘ وائی ایس آر سی پی اور ایم آئی ایم کے ارکان شامل ہیں ۔ محکمہ اقلیتی بہبود کی جانب سے پہلے اجلاس کی تیاریاں کی جارہی ہیں اور ارکان کو پیش کرنے کیلئے اوقاف سے متعلق ریکارڈ تیار کیا جارہا ہے ۔ کمیٹی میں شامل کئی ارکان نے محکمہ اقلیتی بہبود سے ربط پیدا کرتے ہوئے کمیٹی کی کارکردگی اور اس کے اختیارات کے بارے میں معلومات حاصل کی ہیں ۔ بعض ارکان نے تلنگانہ میں اوقافی جائیدادوں اور اُن پر ناجائز قبضوں کی تفصیلات مانگی ہیں ‘ توقع ہے کہ ایوان کی کمیٹی کا پہلا اجلاس اہمیت کا حامل ہوگا ۔