تہران، 13 نومبر (سیاست ڈاٹ کام) ایران نے امریکی صدر کی جانب سے آیت اللہ خامنہ ای کو موسومہ خط کی تصدیق کر دی۔ ایران نے براک اوباما کی جانب سے سپریم لیڈر آیت اللہ علی خامنہ ای کو خط وصول ہونے کی تصدیق کرتے ہوئے ایرانی سپریم نیشنل سکیورٹی کونسل کے سکریٹری علی شامخانی نے انٹرویو میں کہا کہ امریکی صدر کے خط کے جواب میں بنیادی طور پر ایٹمی مسائل پر توجہ مرکوز رکھی گئی ہے۔ ایران نے یہ واضح کر دیا کہ اسے نمائشی اور مضحکہ خیز قسم کی جوہری صنعت کسی طور قابل قبول نہیں۔ ان کا کہنا تھا کہ اس سطح کی خط و کتابت پہلی بار نہیں ہوئی بلکہ ماضی میں بھی خطوط پر ضروری ردعمل دیا جاتا رہا ہے۔ گزشتہ ماہ اوباما نے خامنہ ای کو خفیہ طور پر خط بھیجا تھا جس میں ایران اور عالمی طاقتوں کے درمیان نیوکلیر پروگرام پر جامع معاہدے کو داعش کے خلاف مدد سے مشروط قرار دیا گیا تھا۔ تاہم وائٹ ہاوس نے اس خبر پر تبصرے سے گریز کیا تھا۔
