جنیوا ، 25 مارچ (سیاست ڈاٹ کام) انسانی حقوق سے متعلق اقوام متحدہ کے ادارہ کی سربراہ ناوی پلے نے اسرائیل کی جانب سے یہودی بستیوں کی تعمیر مسلسل جاری رکھنے اور یہودی آباد کاروں کے فلسطینیوں کیخلاف مظالم پر تشویش ظاہر کرتے ہوئے کہا ہے کہ اسرائیل کے یہ اقدامات پورے مشرق وسطیٰ کے امن کیلئے سخت خطرے کا باعث ہیں۔ انسانی حقوق کی سربراہ نے 47 ممالک پر مشتمل انسانی حقوق کونسل سے خطاب کے دوران غزہ میں حالیہ حملوں پر بھی تشویش ظاہر کی ہے۔
واضح رہے کہ اسرائیلی فضائیہ کے ان حملوں اور بمباری سے متعدد فلسطینی لقمہ اجل بن گئے ہیں۔ اقوام متحدہ کی انسانی حقوق کے شعبے کی سربراہ نے جن مزید واقعات پر افسوس کا اظہار کیا ہے ان میں مغربی کنارے اور مشرقی یروشلم میں پیش آئے حالیہ واقعات بھی شامل ہیں۔ ناوی نے کہا کہ مسلسل روکنے کے باوجود اسرائیل کا مقبوضہ علاقوں میں یہودی بستیوں کی تعمیر اور یہودی آبادکاروں کی طرف سے فلسطینیوں پر مظالم کا جاری رہنا افسوسناک ہے۔ ’’ان سرگرمیوں سے صرف فلسطینیوں کا حق خود ارادیت متاثر نہیں ہوتا بلکہ مشرق وسطیٰ کا مجموعی منظر نامہ بھی متاثر ہوتا ہے‘‘۔