تہران ۔ 9 اکٹوبر (سیاست ڈاٹ کام) امریکہ کی طرف سے ایران پر عائد کردہ پابندیوں کے نتیجے میں ایران کی فضائی سروس بھی بْری طرح متاثر ہوئی ہے۔ ایرانی فضائیہ کے ایک سینیر عہدیدار نے اعتراف کیا ہے کہ امریکہ کی اقتصادی پابندیوں کے نتیجہ میں ایرانی فضائی بیڑے کے 50 فی صد طیارے سروس سے باہر کردیئے گئے ہیں۔ایران کے صوبہ فارس کے ڈائریکٹر جنرل رضا بدیعی فرد نے ایک بیان میںبتایا کہ امریکہ کی پابندیوں کے نتیجہ میں ایرانی فضائی بیڑے میں شامل 50 فی صد جہازوں کو فضائی سروسز سے نکال دیا گیا ہے۔خبر رساں ایجنسی ’’تسنیم‘‘ کی جانب سے نقل کردہ بیان میں مسٹر بدیعی فرد کا کہنا تھا کہ امریکہ کی طرف سے عائد کی گئی پابندیوں کے نتیجے میں طیاروں کی ضروری مرمت میں بھی مشکلات پیش آ رہی ہیں۔ ان کا کہنا تھا کہ مرمت نہ ہونے کے نتیجے میں ہوائی جہازوں میں فنی خرابی کے واقعات اور اس کے باعث جہازوں کی ہنگامی لینڈنگ کے واقعات میں اضافہ ہو رہاہے۔
