کابل ، 7 ستمبر (سیاست ڈاٹ کام) امریکہ کے سیکریٹری دفاع جیمز میٹس افغانستان کے اچانک دورے پر کابل پہنچ گئے۔ امریکی خبر رساں ایجنسی اے پی کے مطابق افغانستان میں امریکی کمانڈ نے جمعہ کو جیمس میٹس کے دورے کی تصدیق کی تھی، تاہم اس کی جانب سے مزید کوئی تفصیلات نہیں دی گئیں۔ امریکی سکریٹری دفاع کے دورے کے دوران ان کی افغان، امریکی اور ناٹو ملٹری کمانڈرز سے ملاقاتوں کے علاوہ افغان صدر اشرف غنی سے بھی ملاقات متوقع ہے۔ جیمس میٹس کا دورہ افغانستان میں ایک خودکش حملے میں 21 افراد کی ہلاکت کے چند روز بعد سامنے آیا ہے، جبکہ رواں ہفتے حملوں میں ایک امریکی فوجی اور مقامی پولیس کے 8 اہلکار بھی ہلاک ہوچکے ہیں۔ دوسری جانب واشنگٹن، افغانستان میں جاری طویل جنگ کے خاتمے کے لئے مذاکرات کا راستہ اختیار کرنے کا خواہشمند ہے۔ اس سلسلے میں امریکی سکریٹری خارجہ مائیک پومپیو نے رواں ہفتے زلمے خلیل زاد کو افغان امن عمل میں واشنگٹن کا نمائندہ مقرر کرنے کا اعلان کیا تھا۔ زلمے خلیل زاد خطے میں متنازعہ سمجھے جاتے ہیں جو افغانستان میں امریکہ کے سابق ایلچی بھی رہ چکے ہیں۔
