بروسیلز ،21جون (سیاست ڈاٹ کام) امریکہ اور یوروپی یونین کے مابین تجارتی جنگ میں یوروپ نے بھی صدر ٹرمپ کو درآمدی ٹیکس کے حوالہ سے مناسب جواب دے دیا ہے ۔ اب امریکی مصنوعات کی یونین میں درآمد پر اربوں یورو کے نئے ٹیکس کا نفاذ 22 جون سے ہو جائے گا۔امریکی صدر ڈونالڈ ٹرمپ نے جاریہ ماہ کے آغاز سے یوروپ سے امریکہ درآمد کی جانے والی فولاد اور ایلومینیم کی مصنوعات پر 10 سے لے کر 25 فیصد تک جو نئے اور اضافی ٹیکس عائد کرنے کا فیصلہ کیا تھا، ان کی وجہ سے بروسیلز اور واشنگٹن کے مابین تجارتی شعبے میں پہلے سے پایا جانے والا اختلاف رائے مزید شدید ہو گیا تھا۔یوروپی یونین کا کہنا تھا کہ صدر ٹرمپ کو امریکہ کے اقتصادی مفادات کے تحفظ کے نام پر ایسے ’’حفاظت پسندانہ فیصلے ‘‘کرنے کی کوئی ضرورت نہیں تھی۔ لیکن اگر ”انہوں نے یہ فیصلہ کر ہی لیا ہے تو یوروپ بھی خاموش نہیں بیٹھے گا” اور یوروپی یونین کے رکن ممالک میں امریکی مصنوعات کی درآمد پر بھی جواباً اضافی ٹیکس عائد کریں گے ۔
