ماسکو ، 11 مارچ (سیاست ڈاٹ کام) ایک امریکی اور دو روسی خلابازوں نے تقریباً چھ ماہ بین الاقوامی خلائی اسٹیشن پر گزارنے کے بعد منگل کی صبح زمین پر واپسی کی ہے۔ سویوز نامی خلائی گاڑی انھیں لے کر بحفاظت قازقستان میں قائم ایک تنصیب پر اتری۔ خلائی تحقیق کے امریکی ادارہ ’ناسا‘ کے مطابق خلائی کیپسول میں ناسا کے خلاباز مائیک ہوپکنز، روس کے اولیگ کوٹوف اور سرگئی ریازانسکی سوار تھے۔ ٹوئٹر پر ایک پیغام میں ناسا نے کہا کہ تینوں افراد ’’محفوظ‘‘ ہیں اور ’’کشش ثقل سے ہم آہنگ‘‘ ہونے کی کوشش کر رہے ہیں۔ نومبر میں عملے کے دو روسی ارکان سوچی اولمپکس کی مشعل لے کر خلا میں گئے تھے جہاں تاریخ میں پہلی بار اس مشعل کو خلا میں چہل قدمی کے دوران بھی ساتھ رکھا گیا۔ یہ مشعل بعدازاں زمین پر واپس بھجوا دی گئی جسے گزشتہ ماہ روس کے شہر سوچی میں منعقدہ سرمائی اولمپکس کی افتتاحی تقریب میں روشن کیا گیا۔
