نیویارک،28مارچ (سیاست ڈاٹ کام) یہ دلچسپ اور حیرت انگیز خبر امریکہ سے آئی ۔ایک ہاسپٹل کے زچہ و بچہ وارڈ یا لیبروارڈ میں جہاں حاملہ خواتین کا آنا جانا لگا رہتا ہے ، جن کی دیکھ بھال کے لئے وہاں نرسیں بھی موجود ہوتی ہیں۔مگر کبھی ایسا دیکھنے میں نہیں آیا کہ لیبر وارڈ کی تمام نرسیں بیک وقت حاملہ ہوجائیں اور ان کے بچوں کی پیدائش بھی لگ بھگ ایک ساتھ ہو۔مگر امریکی شہر پورٹ لینڈ کے میئن میڈیکل سینٹر میں ایسا انوکھا واقعہ ہوا ہے جہاں کی 9 نرسیں آگے پیچھے حاملہ ہوئیں اور بچوں کی پیدائش اپریل سے جولائی کے درمیان متوقع ہے ۔سی سی این سے بات کرتے ہوئے ایک نرس ایرن گرینیر نے کہا’’جب ہم سب نے ایک دوسرے کو کہا کہ ہم حاملہ ہیں تو میرے خیال میں ہر بار اس اعلان پر ہمیں خوشی ہوئی اور ہم ایک دوسرے کا خیال رکھنے کے لیے تیار ہیں‘‘۔اس ہاسپٹل نے اس انوکھے واقعہ کا اعلان کیا اور نرسوں کو مبارکباد بھی دی۔ہاسپٹل نے لوگوں کے ان خدشات کا بھی جواب دیا جو یہ سوچ کر پریشان تھے کہ گرمیوں میں وہاں عملہ کی کمی کا سامنا ہوگا۔اس پر ہاسپٹل انتظامیہ کا کہنا تھا کہ فکر مت کریں ہم نے منصوبہ تیار کررکھا ہے ۔تمام نرسیں اس حوالہ سے ایک دوسرے کی مدد کررہی ہیں اور ان کا کہنا ہے کہ ہاسپٹل میں آکر کام کرنا اچھا لگتا ہے جہاں دیگر خواتین بچوں کو جنم دیتی ہیں اور اس تجربے کے بارے میں بتاتی ہیں، جس سے ہم سب ایک ساتھ گزرنے والے ہیں۔
