واشنگٹن ۔ 26 جولائی (سیاست ڈاٹ کام) امریکی محکمہ خزانہ نے شام کے کیمیائی ہتھیاروں کے پروگرام سے وابستہ پانچ گروپوں اور آٹھ افراد کے خلاف پابندیاں عائد کردی ہیں۔امریکی محکمہ خزانہ نے ایک بیان میں کہا ہے کہ پابندیوں کا ہدف گروپ اور افراد ایک نیٹ ورک میں کلیدی حیثیت رکھتے تھے۔یہ نیٹ ورک کیمیائی ہتھیار تیار کرنے والی شامی ایجنسی کے لیے الیکٹرانکس کا بندوبست کرتا تھا۔محکمہ خزانہ کے انڈر سیکریٹری برائے انسداد دہشت گردی سیگال مینڈلکر نے بیان میں کہا ہے کہ ’’ شام کی جانب سے بے گناہ خواتین اور بچوں کے خلاف ہولناک طریقے سے کیمیائی ہتھیاروں کا استعمال ہمارے ذہنوں کو بدستور جھنجھوڑتا رہا ہے‘‘۔انھوں نے مزید کہا ہے کہ ’’ ہم اسد حکومت کے سفاکانہ حملوں کو روکنے کے لیے اپنی مہم کو جاری رکھے ہوئے ہیں اور کیمیائی ہتھیاروں کے پروگرام کی معاونت کرنے اور اس کے لیے آلات خرید کر مہیا کرنے والے نیٹ ورکس کو پابندیوں کا ہدف بنا رہے ہیں‘‘۔
