واشنگٹن۔ 8 نومبر۔ ( سیاست ڈاٹ کام) صدر اوباما نے پہلی سیاہ فام امریکی خاتون لوریٹا لینچ کو اٹارنی جنرل کے عہدہ پر تعینات کرنے کا فوری فیصلہ کیا ہے۔ یہ فیصلہ حالیہ وسط مدتی انتخابات کے باعث اوباما انتظامیہ کیلئے اہمیت کا حامل ہو گیا ہے۔وسط مدتی انتخاب کے دوران سینیٹ میں اکثریت پا لینے والی ریپبلکن پارٹی کا موقف ہے کہ یہ تقرری اگلے سال تک موخر رکھی جائے۔واضح رہے امریکی سینیٹ کے نئے منتخب ہونے والے ارکان ماہ جنوری میں سینیٹ میں ا پنی ذمہ داریاں سنبھالیں گے، جس کے بعد اوباما کیلئے نئی اٹارنی جنرل کیلئے سینیٹ سے توثیق کرانا مشکل ہو جائے گا۔امریکہ کے پہلے سیاہ فام صدر اوباما اپنی مدت صدارت کے دوران اٹارنی جنرل کے عہدہ پر دوسری سیاہ فام شخصیت کو مقرر کرنے والے ہیں۔ اس امر کی تصدیق صدر اوباما کے پریس سکریٹری جاش ایرنیسٹ نے کر دی ہے۔صدر اوباما نے اس سے پہلے 2009ء میں قانون دان ایرک ہولڈر کو امریکہ کا پہلا سیاہ فام اٹارنی جنرل مقرر کیا تھا، جو رواں سال ماہ اگست تک اپنے عہدہ پر موجود رہے۔ 55 سالہ لوریٹا بینک فراڈز اور کرپشن کے مقدمات کو سمجھنے کے علاوہ بنیادی انسانی حقوق کے معاملات کے حوالے سے تجربے کی شہرت رکھتی ہیں۔
