واشنگٹن، 13 نومبر (سیاست ڈاٹ کام) دنیا بھر میں روزمرہ کی بنیاد پر میاں بیوی میں علیحدگی اور طلاق کے ان گنت واقعات رونما ہوتے ہیں۔ مگر امریکہ میں ایک طلاق معاصر تاریخ کی مہنگی ترین طلاق قرار دی گئی ہے، جس میں مطلقہ کے سابقہ شوہر کو عدالت نے تقریباً ایک ارب ڈالر کی رقم طلاق کی مد میں ادا کرنے کا حکم دیا ہے۔ ذرائع کے مطابق حال ہی میں ایک امریکی عدالت نے امریکی آئل فرم ’کانٹیننٹل ریسوریز‘ کے ڈائریکٹر ہارولڈ ہام کی مطلقہ بیوی کی طلاق کی درخواست پر فیصلہ سناتے ہوئے دونوں میں جدائی کا اعلان کیا اور ساتھ ہی سابق ہو جانے والے شوہر کو 994 ملین ڈالر ادا کرنے کا حکم دیا ہے۔ امریکی بزنس میگزین ’فوربز‘ کے مطابق ارب پتی 68 سالہ ہارولڈ ہام کی آئل کمپنی کانٹیننٹل ریسورسز کے اثاثوں کی مالیت 14 ارب ڈالر سے زیادہ ہے۔ رواں سال جریدے نے امریکہ کے 400 امراء کی فہرست میں ہام کو 33واں امیر ترین شخص قرار دیا تھا۔ امریکہ کی جنوبی ریاست اوکلا ہوما کی عدالت نے دو روز قبل جاری کردہ اپنے فیصلے میں ہارولڈ ہام کو حکم دیا کہ وہ اپنی مطلقہ بیوی 58 سالہ سون آن کو رقم ادا کرے۔ رپورٹ کے مطابق ہارولڈ مطلقہ بیوی کو 22 ملین ڈالر کی رقم ادا کر چکے ہیں، اور عدالت نے بقیہ رقم 20 جنوری 2015ء تک ادا کرنے کا حکم دیا ہے۔
