واشنگٹن۔ 27فروری (سیاست ڈاٹ کام) امریکی پارلیمنٹ کے ایوان زیریں یعنی ایوان نمائندگان نے ایک قرارداد منظور کرکے صدر ڈونالڈ ٹرمپ کی جانب سے جنوبی سرحد کے قضیہ پر کئے گئے اعلان قومی ایمرجنسی کو ختم کر دیا۔ایوان نمائندگان نے منگل کو 245-182 کی اکثریت سے اس قراردادکو منظور کرلیا۔ اب یہ قرارداد مشاورت کے لئے امریکی پارلیمنٹ کے ایوان بالا یعنی سینیٹ کے پاس جائے گا۔مسٹر ٹرمپ نے اسی ماہ امریکہ-میکسیکو جنوبی سرحد پر دیوار بنانے کے لئے 8ارب ڈالر کی رقم مختص کرنے کا مطالبہ کرتے ہوئے قومی ایمرجنسی کا اعلان کیا تھا۔امریکی صدر کا کہنا ہے کہ یہ دیوار دہشت گردوں اور مجرموں سے ملک کے دفاع کے لئے بہت اہم ہے ۔امریکی کانگریس نے دیوار کی تعمیر کے لئے طلب کی گئی 5.7 ارب ڈالر کی رقم دینے سے انکار کر دیا تھا جس کے بعد مسٹر ٹرمپ نے اس کے لیے 8ارب ڈالر کی رقم کی ضرورت بتاتے ہوئے قومی ایمرجنسی کا اعلان کر دیا تھا۔
