کابل،14جولائی(سیاست ڈاٹ کام) افغانستان میں امریکی فوج کی بمباری سے 41 افراد ہلاک ہوگئے اور متعدد زخمی ہوگئے جبکہ حملے میں ایک مسجد بھی شہید ہوئی جبکہ کئی گھروں، گاڑیوں اور ایک پٹرول پمپ کو بھی تباہ کر دیا گیا۔ میڈیا رپورٹس کے مطابق امریکی طیاروں نے صوبہ پکتیا میں بمباری کی جس سے بھاری جانی ومالی نقصان ہوا ہے ۔ امریکی فوج نے ضلع زرمت میں بمباری کی جبکہ اس دوران زمینی امریکی فوج نے بھی کارروائی کی۔ عینی شاہدین نے بتایا کہ امریکی فوج نے شملزئی گاؤں میں عام شہریوں کے گھروں پرشدید بمباری کی جس کے نتیجے میں خاصدارنامی شخص کا مکان مکمل طور پرتباہ ہوگیا اور وہاں موجود15افراد جن میں اکثریت خواتین اور بچوں کی تھی ہلاک ہوگئے ۔ بمباری کے بعد جب وہاں کے مکین لوگوں کو ملبے سے نکالنے کیلئے پہنچے تو امریکی طیاروں نے پھر بمباری کی جس سے مزید افراد ہلاک ہوگئے ۔
